此網誌關閉

此網誌將會遷移到 http://bananasims.info/ ，敬請留意。

預備搬 blog

而家申請咗 TECHNETCAL 既空間，準備將網誌搬去 bananasims.info（不過未搞過）。遲啲呢個 blog 將會廢棄。

而家順便講下我幫人寫既多用戶網誌系統開發成點：
本來左手面無野，不過好怪，所以要諗啲嘢塞入去，最後諗到最新消息。
其實收既錢唔算太多，所以我無諗住搞報告呢忽，不過最後搞咗。呢度無核選掣，得粒結案同埋檢視詳細資訊嘅掣。

免費 bananasims.info 域名

話說 AL8 Forum 發生咗笨星星事件，嗰個笨星星將十個 AL8 會員既 ***.info 域名買咗（1 美元一個）再玩攻擊（唔係攻擊我啦）。
而家個笨星星仲要弱智到送出黎，而 AL8 有人拎咗域名擁有權並且喺 goddaddy.com 到轉移比我，而我而家就有一個免費既 bananasims.info 域名。


我而家應該自己喺 I-Circle 架個 blog，定還是將個 DNS set 黎 Blogger 呢個 blog 呢？其實我都有啲想重架個 blog，不過我又覺得好麻煩…

開發中網誌

I-Circle 會推出網誌？唔係，呢個只係我做 freelance 其中一個多用戶網誌系統 project。由於個客尚未提供標誌、討論區名稱，所以我用住 I-Circle 個名。

呢個 project 除咗用黎賺返少少錢幫補外，仲可以叫小試牛刀，學／試寫下一啲 Framework 同埋改善用戶介面新技術。

呢啲新野，表面上既有頭頂導覽列（不過個箭咀我畫得幾核突）、form check（會喺 input 整埋紅色同顯示錯誤資訊）同埋頭頂訊息；內裏既就有新玩既 Smarty 同埋 jQuery。我個人覺得呢幾樣野，對於一個 user-friendly 網站頗為重要。我至憎好似 Discuz! 咁樣填錯野乜都無晒。

整好呢個多用戶網誌系統，就可以考慮係咪同 I-Circle 寫個 CMS 啦，因為 Drupal 喺部份情況下實在太唔方便。

模擬市民 3 後感

其實模擬市民 3 已經「推出」已經成個月，我都差唔多玩咗一個月。不過，而家我玩厭晒…

當模擬市民 3 啱啱「推出」，即係大約五月中，已經鬼咁急想下載黎玩同寫個 I-Circle 模擬市民網。下載咗差唔多兩日，喺第部機剷埋機先玩到。初頭入日落溪谷都覺得唔係好 lag。不過，好唔慣個新介面，幾經辛苦先至入到去個家庭玩。

初試
一入到去，就想試下個無縫社區。一搬咗入去就走去人地屋企、公園、海灘。初頭我仲諗住去個海灘游下水，點知個海灘係用黎釣魚。呢個無縫社區玩一陣就覺得悶，所以又起樓。

購物模式及建築模式
購物模式同埋建築模式係一個全新既介面。老實講，我唔鐘意呢個懶型介面。呢個介面除咗得個型字之外，都唔多實用。例如，如果我要揀個煙囪、地基，就要喺度慢慢搵，好唔 user-friendly。

起咗個 L 字型屋，玩落都係同模擬市民 2 大致相同。

而購買模式就唔同啦。眾所周知模擬市民 2 雖然可以用秘技整到用斜角放野，不過好多位都係放唔到。模擬市民 3 最驚喜既係對斜角既支援多咗好多，基本上週圍放都得（仲要係 functional），自由好多。

講購物模式同埋建築模式不得不提就係「創造風格」。呢個創造風格可以令我地自訂差唔多所有野，相框、窗、地板等等都可以改材質，正！以前模擬市民同模擬市民 2 成日比傢俬顏色限制住我放乜傢俬，而家可以揀咗傢俬外型再揀色，真係唔錯。

不過…最可惜…模擬市民 3 啲 object 真係少得好可憐，我諗模擬市民 2 既 75% 都無。好似啲畫，以前起碼四十幾幅，而家得廿幾，搞到一間屋黎黎去去都係用嗰幾張畫（最後出動到要模擬市民自己畫）。其實，我懷疑 EA 係咪覺得創造風格呢個功能係所向無敵，定係又想昆人錢走去 The Sims Store 到買傢俬？

生活模式
求求其其起好間屋就算啦，最緊要都係玩下生活，因為起屋整人好玩極都有個譜。

識我既人，我啲鎮既模擬市民黎黎去去都係一樣樣，因為我通常玩預設家庭同埋預設人樣。我玩乜家庭？就係嗰個馬丁尼茲家庭，第一個嗰對夫婦。初頭玩，當然要搵工做啦。

因為 EA 晨早同佢地揀咗個終生期望，所以佢地都係做返運動同埋政治。今次職業都唔錯，可以睇住佢地搭車去返工，而且差唔多樣樣都有特別野。例如運動每個禮拜三同日都要比賽，又可以搞簽名會；政治就係可以叫人比競選捐款。咁樣訓練下啲技能、升職、連終生期望都達成埋，開始悶…

尋找樂趣
玩 game 悶就當然要尋找樂趣啦。模擬市民 3 係無縫社區，所以可以無啦啦走去人地屋企／公園到睇發生乜事。忽然間諗起有樣野叫墳場，所以走去墳場到睇啲鬼。啲鬼無模擬市民 2 咁正，啲鬼竟然係識行路…

淨睇當然唔好玩，所以叫晒一家大細走去墳場玩。之前提過，政治職業可以叫人捐錢，所以我今次玩下野，試下可唔可以屈啲鬼比錢。同啲鬼交流，用超級秘技將關係較到做死黨（即係麻吉。我好憎台灣用字，難聽兼核突），屈佢錢，竟然收到 200 蚊…好正…

淨係玩一樣唔好玩。記起之前買咗個燒烤爐收咗去隨身物品清單，又見佢可以週圍 drag 出黎玩，所以今次帶幾條魚、熱狗，一家大細凌晨去墳場燒烤。模擬市民覺得若無其事，我就當然覺得好得意，好鬼死正。有時啲鬼會坐埋黎燒棉花糖添。後尾仲試下結他、美式欖球…最後就係「墳場活化」，斬晒啲無葉樹，裝大量街燈同反射地版，唔會有種草木皆兵既感覺。

後尾都係覺得好無聊，上網睇見到可以食神仙菜將鬼復活，又玩下先。因為煮神仙菜要死神魚、生命果（詳見復活），所以又要狂操園藝、釣魚同廚藝技能，搵呢啲原料出黎。玩落，又體驗到幾種新技能有大進步：園藝可以自己執種子／超級市場買果實，真實；釣魚又可以揀餌，又有 trial and error。有啲魚要喺指定時間釣；廚藝要有材料煮野，或者比錢自己攪材料，幾真。

千辛萬苦，用咗現實兩日時間先至煮到碟神仙菜。好彩又咁啱接到個「噢，我的靈魂！」機會，成功將鬼魂復活。復活完，又要諗玩乜…所以我又玩無聊野（Freeman 到學到的），將成個鎮啲人復活……用咗差唔多兩三個鐘既時間先至復活晒，不過編輯城鎮嗰度狂話唔夠床位…

又要再次尋找樂趣…做完，玩返職業…寫作、音樂乜都做下，知下有乜特別野。

始終都係太無聊，所以荒廢咗隻模擬市民 3 一陣。後尾先知原來可以種芝士、牛扒，而實驗室棵綜合植物又係特別野黎（詳見栽種特別品種的植物），所以開返 game 玩。狂操園藝兼等機會。我覺得呢個仲難、仲有耐性過玩神仙菜。神仙菜至少知道死神魚點釣，點先有得煮…呢啲機會黎得真係好隨機。嗰陣真係用咗成日喺度等機會，等電話響…初頭諗過放棄，不過為咗個網嗰頁，都係等，終於等到。分享寫晒喺篇文到，自己睇啦。

總結
開頭講咗啦，我而家玩厭晒。我已經有 3 日無入到模擬市民 3，因為個耐玩性比模擬市民 2（唔包資料片）低得多。如果 EA 出返多啲傢俬，可以比人自己設計城鎮，我相信模擬市民 3 會更加、更加好玩。

另外，模擬市民 3 啲中文用字翻譯（唔係指台灣字）大退步。燒烤爐上面有個「撲滅」，竟然係收起個爐；「悲劇小丑」（Tragic Clown）竟然比人譯咗做「崔吉克．克隆」、「警車」又譯咗做「游艇」、「花生牛油果醬麵包」又譯埋做「花生醬與水母果醬」，仲有更多…呢啲翻譯真係大退步，譯得差的話會變咗一道語言牆，好似「崔吉克．克隆」，無玩英文的話根本唔知原來呢個係模擬市民 1 既悲劇小丑。不過，我又想講，今集啲專有名詞譯得幾好，好似「克蘭普巴頓」（CrumpleBottoms），譯得好過 2 代既「羅波巴騰」等等。

宣傳下先，I-Circle 模擬市民網既模擬市民 3 基本內容已經完成。另外，本站設有原文同埋香港對譯（當然改埋上面啲用詞謬誤），唔明咩叫「萊姆」、「起司」既人記住上去睇睇。

講返聲，我會出個香港版既語言包。當然又係修改謬誤 + 香港用詞。記住支持下。

旺角東站 B 出口進度

間 7-11 開咗，而原來有既美心西餅位置都會開返美心。

隨機圖片程式 2.0 已經發佈

Swiftzer Lab 所製作的隨機圖片程式 2.0 已經發佈，請移玉步至 Swiftzer Lab 的下載頁下載。

本程式及本文件所有內容均使用共享創意署名－非商業性 3.0 香港授權條款發佈。